کرونا سے بچاؤ کے لئے دو مختلف ٹیکے زیادہ مؤثر ثابت ہوسکتے ہیں

جنوبی کوریا میں کئے گئے ایک تجربہ میں یہ بات سامنے آئی کہ کرونا ویکسینیشن کے عمل کے دوران دو مختلف ٹیکے لگوانے سے قوت مدافعت زیادہ بڑھ جاتی ہے ۔ اس تجربہ میں جو تقریبا پانچ سو طبی ورکرز پر کیا گیا اور جنہیں وقفہ کے ساتھ ایسٹرا زینیکا اور فائزر بیون ٹیک کے ٹیکے لگوائے گئے تھے ، ان میں چھ گنا زیادہ اینٹی باڈیز پائی گئیں ۔ یہ تعداد ایک ہی قسم کے دو ٹیکے لگوانے والوں سے زیادہ ہے ۔ برطانیہ میں بھی چند ہفتے قبل کرائے گئے ایک سروے میں ایسے ہی نتائج سامنے آئے تھے ۔ تاہم ابھی تک عالمی ادارہ صحت یا کسی ہسپتال و ڈاکٹر نے باقاعدہ طور پر ایسا کرنے کا مشورہ نہیں دیا ہے ۔