کامن ویلتھ گیمز میں پاکستان کا پہلا گولڈ میڈل

برطانیہ کے شہر برمنگھم میں جاری کامن ویلتھ گیمز 2022 میں پاکستان کو سونے کے تمغہ کی شکل میں پہلی کامیابی ملی ہے ۔

پاکستانی ویٹ لفٹر نوح دستگیر بٹ نے اسنیچ اور کلین جرک میں سب سے زیادہ 400 کلو گرام وزن اٹھا کر بھارت ، آسٹریلیا ، انگلینڈ اور کینیڈا کے ویٹ لفٹرز کو شکست دے کر نئی تاریخ رقم کردی ہے ۔

ویٹ لفٹنگ کے مقابلوں میں چاندی کا تمغہ نیوزی لینڈ اور کانسی کا تمغہ بھارت حاصل کرنے میں کامیاب رہا ۔

پاکستان کے ویٹ لفٹر نوح دستگیر نے سونے کا تمغہ جیتنے کے بعد اپنے پیغام میں کہا کہ 7 سال کی کڑی مشقت کے بعد یہ کامیابی نصیب ہوئی ۔ اتنا وزن اٹھانا آسان نہیں تھا بارہ تیرہ سال لگے ایک مشکل کام کو آسان کرنے میں ۔

یاد رہے کہ نوح دستگیر نے پچھلے کامن ویلتھ گیمز میں کانسی کا تمغہ حاصل کیا تھا ۔

انہوں نے اپنی کامیابی کا سہرہ اپنے والد کے سر باندھا جن کی نگرانی میں انہوں نے ٹریننگ کے سخت مراحل طے کئے ۔

دوسری جانب جوڈو کی مائینس 90 کیٹیگری میں شاہ حسین شاہ نے کانسی کا تمغہ اپنے نام کرکے پاکستان کا پرچم اقوام عالم میں سر بلند کیا ۔

شاہ حسین 2014 کے کامن ویلتھ میں چاندی کا تمغہ اپنے نام کرچکے ہیں ۔

کامن ویلتھ گیمز میں پاکستان کے 6 ایتھلیٹس مقابلوں سے باہر ہوچکے ہیں ۔

جیولین تھرو میں پاکستان کے ارشد ندیم فائنل تک رسائی حاصل کرنے میں کامیاب ہوچکے ہیں ۔