ہندوستان میں پہلی میٹاورس شادی کی تیاری

عالمی وبا کرونا نے زندگیوں کے ڈھنگ ہی تبدیل کردئیے ہیں ۔ سماجی فاصلہ کی دوری نے روایتی جشن اور تقاریب کے چلن کو متاثر کیا ہے ۔ گنجان آباد ملک اور شہر اس وبا سے زیادہ متاثر ہوئے ہیں کیونکہ وہاں کے مکینوں کو نئی پابندیوں کا زیادہ سامنا کرنا پڑتا ہے ۔

ہندوستان کووڈ سے متاثرہ بڑا ملک ہے وہاں کے مکین اس وبا اور پابندیوں میں زندگی آگے بڑھانے کے نئے ورچوئل راستے ڈھونڈ رہے ہیں ۔ ایک ہندوستانی تامل ناڈو کا دنیش شیو کمار پدماوتی اپنی میٹاورس شادی کے لئے تیاری کررہا ہے ۔ کیونکہ ہندوستان میں شادی کے اجتماعات میں وبا کے دوران صرف 100 افراد کو ہی ایک جگہ اکٹھا ہونے کی سرکاری اجازت مل رہی ہے ۔ اگلے ماہ دنیش نے اپنی میٹاورس شادی میں دو ہزار لوگوں کو دعوت دی ہے ۔

ہیری پوٹر کے پرستار ہونے کی وجہ سے انہوں نے اپنی ورچوئل شادی کو ہوگوارڈ کی تھیم دی ہے جس میں لوگ اپنی لیپ ٹاپس ، ٹیبلیٹس اور اینڈرائڈ کے ذریعہ شریک ہوسکیں گے ۔

میٹا ورس کے ذریعہ ایک ورچوئل 3 ڈی ڈیجیٹل ماحول کو کری ایٹ کیا جاسکتا ہے ۔ جس میں بہت سے افراد ورچوئلی جمع ہوکر بات چیت کرسکتے ہیں ۔ اس حوالہ سے دولہا ایک سوفٹ وئیر ہاوس سے ہوگوارڈ جیسی قلعہ نماڈیجیٹل جگہ بنوا رہے ہیں ۔

ان کی شادی قریبی رشتہ داروں کی موجودگی میں ہوگی لیکن اس کے بعد نیا شادی شدہ جوڑا لاگ ان کرے گا ۔ اس ورچوئل پنڈال کو ڈیزائن ، ڈیولپمنٹ پر ڈیڑھ لاکھ ہندوستانی روپے خرچ ہوئے ہیں ۔ ایک گھنٹہ تک جاری رہنے والے اس ڈیجیٹل جشن میں نوبیاہتا جوڑا مختلف ورچوئل ایکٹیویٹی کے ذریعہ اپنے مہمانوں کو انٹرٹین کرسکیں گے ۔